La montagna Rock

‘Ndone a Veder?

Testo: Renzo e Sepp Corona - Guide Alpine

Ditu che, par mi ven fora na bèla via, tra quela colada bagnada a destra e quela a sinistra, speton che sie en cich pì calt parché là sol no ghen vedon.

A forza de ndar su par la Rodetta e la Zima delle Scarpe me scampa sempre el ocio su par la parete Nord dela Pala… Masa bèla, scónta e con poche vie, ghe ol meterghe su le man prima o dopo. En dì cate me cosin e ghe dighe la me idea, no l’é la prima olta che ndon a pìantar ciodi (pochi) in giro, ne caton ben, se dis fon cubia, ih oh, el dis ndon a veder i ciodi i porte mi.

Poche parole, ancora manco a decider, se ciapa e se và, onde no importa se l’é vie nove meo. Colvert, Rosetta, do ciacole col Turra, na feta de torta, en café dala Anita, e via, su par la forcelletta a veder, dó sot ala Zima dele Scarpe ne fermon a darghe en ocio… poche nicchie… Quasi gnanca una, cenge no se ghen parla fin sora ala metà, ditu che ti… quanti tiri saralo… sete… oto…

Dopo la mola, ghen saralo su ciodi? No importa, par mi la ha de eser bèla in ogni caso. Dopo se ven fora anca na via nova meo, dài dài che proon a veder… ih oh ndon.

Cavon le brusche par el prim tiro… Sass pìcol el parte, fin al quarto no se usa ligarse, e la montagna rock sempre un de na banda e un de n’altra, tanto… se se cata co lé ora de ligarse tel stes posto. Placca verticale, saralo che? Quinto? Boh, però bel “recupero”… Noi no ne dison altro, no serve altro. Adeso però la cambia, l’é pì dur… Dài che proe, se no son bon ti và ti… su pìan, clessidra…

En ciò! Alora qualcheduni i é già pasadi… però dent che ‘ndea… l’é istés su en cich a sinistra, mete en stopper, (pense se avese drio qualche friend magari… me toca torli ma i costa masa), ocio che qua no so se se pasa! N’altro ciò! Però forti sti qua, saralo stat chi, pense…

A sinistra no oi ndar, se va a finir fora de la verticale, alora su dret e pò a destra, ancora pì dur… ciodi gnent, clessidra, stopper par cener su le corde… recupero! No sta picarte che no so se la é tant bona la sosta, ih oh… parto.

E adeso ditu che? Me par lustro… secondo mi en cich a destra e pò su dret se pasa dopo par che la mole… cenge, busi, sfiese no ghen vede, però crot bel… proon dài… su co le recie… me toca meter qualcos de bon se no no vaghe… clessidra! Qua no lé pasà nesuni, me sa lé pì dur de sot. Adeso proe… ocio… ben… se pase qua auguri par chi che paserà mi no torne segur. Bel però, naltro stopper picol, spunton par cener su le corde e su. Orca, spèta, me par che son su en bel tòch dal rinvio… do metri!… eco, qua ghe ol meter en ciò almanco… stiche, smache, eco sto qua el é bon… recupero!

Adeso la mola me par. Su dret… che bel crot… uno, doi, tre tiri… sol recupero, no serve altro. Masa bel sto posto, nesuni che romp, che ciacola. Par de èser fora del mondo e son tacadi ala funivia. Foto? Orca, la macchina a casa (le foto le resta te la testa). Co son in sosta varde intorno… qua se pol far altre vie, quel pilastro, varda che placca là… Adeso son fora dalla verticale… fone che? ‘Ndon… lé criccole, ghe ol dir far su le corde e su… sempre un par vers… tanto la zima l’é una sola… se vedon al bivacco… ih oh bèla… bergheil… elo che ora? Gnanca el arloio no ghe n’é te la refa, no importa, tanto la funivia no la ciapon instes, l’é già serada. Alora dó par le giare dela zima, dopo al prim canal dela normale… gnanca pensar de tirar fora corde… Ometti? Bah, par de là se va, nebbie come al solito, primo pinnacolo… se vet dó el ghiacciaio… ditu che la sarie pì curta taiar dó dreti par el canal e dopo dó par la Val de Roda. Ih oh dài, ‘ndon, qua ghe ol far na doppia, ghe n’ha de eser qualcos el me dis, quela ólta dela Solleder in inverno son vegnesti dó qua, caton en cordin… meo cambiarlo… dó alora.

Ruele dó le corde? Boh, vaghe a veder, pò ancora una e son tel ghiacciaio, ghe n’é en ciò fat a man qua senza stempel. Me ven in ment zento ani fa chi che pasea su de qua, scarpni co le brocche… pica longa… no tanti imbraghi e fettucce… en cich de tabach e na luganega te la scarsela, altri ani. Val de Roda de corsa. Seu ‘ndati ónde, el ne dis el Trapano… Su par la Pala a rampegar…

Ho catà do ciodi su là e ghe conte… me par che i Pape i ha de aer proà su là, el me dis. Olée ben dir, pense, no l’é quarti gradi là. Intant el ha già parecià la poina fumada e la boza de Teroldego, pian co ‘sti biceri… Co se brinda ghe ol sentir, el me dis co i oci lustri!

Proprio bel quel posto.

Aquile Magazine